Իրազեկումը հնարավորություն է տալիս աուտիստիկ սպեկտրի համախտանիշի, դրա բազմազանության ու բարդությունների, ինչպես նաև ուժեղ և թույլ կողմերը, առկա մարտահրավերները ճանաչելու համար ձեռք բերել անհրաժեշտ գիտելիքներ և բարձրացնել հասարակության ըմբռնման մակարդակը:
Իրազեկումը ծառայում է որպես փոփոխության կատալիզատոր՝ այն մարտահրավերներ է նետում կարծրատիպերին և խթանում է կարեկցանքն ու փոխըմբռնումը:
Վերոնշյալ եզրույթները հաշվի առնելով` Աուտիզմ Ազգային Հիմնադրամը 2024թ.֊ից սկսած իրականացնում է իրազեկման ծրագրեր՝ ընգրկելով կրթական տարբեր հաստատություններ՝ սկսած նախադպրոցականից, մինչև բարձրագույն ուսումնական հաստատություններ և կրթօջախներ։
Նպատակը մեկն է՝ ունենալ իրազեկ, կիրթ և ըմբռնող հասարակություն, որը բաց և աջակցող կլինի մեր կողքին ապրող բոլոր այն անձանց նկատմամբ, ովքեր այս կամ այն պատճառով ունեն որոշակի դժվարություններ լիարժեք ներգրավվելու և ապրելու մեր հասարակության մեջ՝որպես լիիրավ անդամներ։
Հունվար ամսից մինչ օրս, իրականացվել է ավելի քան 17 այց՝ տարբեր կրթական հաստատություններ (մանկապարտեզ, քոլեջ, բուհ), ընգրկելով 190-ից ավել մասնակից, տարբեր մասնագիտություններով և պաշտոններով։
Հատկանշական ենք համարում հատկապես մեր սերտ համագործակցության սկիզբը Արաբկիր վարչական շրջանի՝ ի դեմս ղեկավարի աշխատակազմի առաջատար մասնագետ՝ տիկին Օլյա Մարոնյանի հետ, ում շնորհիվ իրազեկման այցեր են կատարվել Արաբկիր վարչական շրջանի գրեթե բոլոր պետական ոչ առևտրային նախադպրոցական հաստատություններ։
Ս.թ. մայիսի 6-ին և 7-ին Վ.Բրյուսովի անվան պետական համալսարանի ուսանողների և պրոֆեսորադասախոսական կազմի ներկայացուցիչների հետ՝ «Կրթական հաստատություններում աուտիզմով անձանց ներառման առանձնահատկությունները» թեմայով դասախոսությամբ հանդես եկավ Աուտիզմ Ազգային Հիմնադրամի արտաքին կապերի և հանրային իրազեկման գծով ղեկավար՝Ինեսսա Հարությունյանը։ Սակայն այս այցը չափազանց կարևորվեց նաև մի շատ նշանակալից իրադարձությամբ։
Հանդիպման արդյունքում համագործակցութան հուշագիր ստորագրվեց «Աուտիզմ» Ազգային Հիմնադրամի և Վ. Բրյուսովի անվան պետական համալսարանի միջև, որով նախատեսվում է իրազեկման միջոցառումներ և ճանաչողական այցելություններ կազմակերպել, խթանել իրազեկվածության բարձրացմանը տվյալ կրթական հաստատությունում։
Հանդիպմանը ողջույնի խոսքով հանդես եկավ ԲՊՀ ռեկտոր Դավիթ Գյուրջինյանը: Նա կարևորեց նման նախաձեռնության իրականացումը թե՛ դասախոսների, թե՛ ուսանողների համար: Նրա խոսքով՝ սա այն առիթներից է, երբ մեզնից յուրաքանչյուրն իր այս կամ այն չափով պակաս գիտելիքները, տեղեկությունները կարող է համալրել, ուղղել իրեն հուզող հարցերը և պարզաբանումներ ստանալ: Նա կարևորեց բուհում սովորող ապագա մանկավարժների մասնակցությունը նման հանդիպումներին:
Աուտիզմի ազգային հիմնադրամի տնօրեն Լիլիթ Աթաջանյանը ևս իր խոսքում կարևորեց թեմայի առավելագույն բարձրաձայնումը, տեղեկատվական միջոցառումների իրականացումը և ուսանողների մասնակցությունը դրանցում:
Նշենք նաև, որ այսուհետ, նաև մեր սիրելի սաներից մեկի՝ Եվա Ղազանչյանի գեղեցիկ կտավը իր տեղը կգտնի բուհի լսարաններից մեկում՝ ի հիշեցում մեր այս չափ կարևոր համագործակցության։
Հանդիպման ընթացքում «Աուտիզմ» ազգային հիմնադրամի մասնագիտական ծրագրերի համակարգող Ինեսա Հարությունյանը երկու մասից բաղկացած տեղեկատվական սահիկաշար ներկայացրեց՝ պատասխանելով ներկաների հարցերին: Ներկայացման առաջին հատվածում նա տեղեկություններ տրամադրեց աուտիզմ ախտորոշման մասին՝ համապատասխան հոլովակների ցուցադրությամբ, իսկ երկրորդ հատվածում ներկայացրեց «Աուտիզմ» ազգային հիմնադրամի գործունեությունը:
Երկօրյա հանդիպումներն ընթացան ակտիվ քննարկումների, հարց ու պատասխանի և մեծաթիվ ուսանողների մասնակցության մթնոլորտում:
